Алишер Мирзо – ўзбек рассоми. Унинг асарлари Германия, Франция, Италия, Испания, Норвегия, Люксембург, Болгария, Югославия, Россия, Япония, Ҳиндистон, Мадагаскар ва Америка Қўшма Штатлари галереялари, музейлари ва шахсий коллекцияларида сақланади. Ижод ишларида импрессионизм ва абстракт санъат элементларини акс эттирган. Ўзбек санъатининг миниатюра ва амалий санъатнинг декоратив услублари каби анъанавий санъат турлари билан уйғунлаштиради. Унинг мавзулари манзара ва натюрмортлардан тортиб, этник ўзбеклар ҳаётининг асл саҳналаригача тасвирланади. Алишер Мирзо 1948 йил 21 мартда Тошкент шаҳрида туғилган. П.П. Бенков номидаги Республика санъат коллежида ва В.Н. Суриков номидаги Москва давлат рассомлик институтида (ҳозирги Москва рассомлик, ҳайкалтарошлик ва архитектура мактаби) таҳсил олган. 1974 йили Беруний номидаги Тошкент давлат политехника институти (ҳозирги Тошкент давлат техника университети) архитектура кафедрасига ўқитувчи лавозимига ишга қабул қилинган. 1976 йилда Москвадаги «Мамлакат ёшлари» кўргазмасида қатнашган. 1977 йилда эса Венгрия, Болгария, Руминия ва Чехословакияда «Мамлакат ёшлари» да иштирок этган. 1978 йилда А. Н. Островский номидаги театр рассомлари институтида маъруза ўқийди. 1997 йилда эса Ўзбекистон Бадиий академиясига аъзоликка қабул қилинади. Ўша йили Камолиддин Беҳзод номидаги Миллий рассомлик ва дизайн институти профессори лавозимига кўтарилиб, ҳозирги кунда ҳам шу лавозимда фаолият юритиб келмоқда. 1990-йилларда А. Қодирий асарларига, жумладан, «Ўтган кунлар» асарига қалам-тасвирда «Кумуш ва Зайнаб», «Хаёл», «Ҳайдалиш куйи», «Фузулийни ўқиб», «Ҳаётим лолазоридан айурдинг» ва бошқа асарлар яратиб миллий графика ривожига катта ҳисса қўшди. 1972 йилдан республика ва хорижий кўргазмаларда асарлари билан қатнашади. Рассом ҳақида «Палитра» (1983) ва «Алишер Мирзо» (2000) номли фильмлар ишланган. Абдулла Қодирий номидаги Ўзбекистон Давлат мукофоти лауреати (1994). «Эл-юрт ҳурмати» ордени билан мукофотланган (1999). Алишер Мирзо санъатнинг нафақат ранг-тасвир жанрига, балки адабиётга ҳам ўз ижоди билан катта ҳисса қўшган ижодкорлардан. Унинг «Мусаввир» романи ва «Каллахоналик йигитча» номли автобиографик романи шулар жумласидандир.
